மலேசிய புதிய பாஸ்போர்ட் வெளியீடு தற்காலிகமாக நிறுத்தம் – குடிநுழைவுத் துறை அதிகாரப்பூர்வ விளக்கம்
மலேசியாவின் புதிய கடப்பிதழ் விநியோகம் தற்காலிகமாக ஒத்திவைக்கப்பட்டது. ஜூன் 1 முதல் அறிமுகமாக இருந்த திட்டம் தற்போது நிறுத்தப்பட்டுள்ளது. குடிநுழைவுத் துறை அலுவலகங்களில் நெரிசலை தவிர்க்க இந்த முடிவு எடுக்கப்பட்டது. தற்போதைய கடப்பிதழ்கள் காலாவதி தேதி வரை செல்லுபடியாகும். புதிய கடப்பிதழில் 94 மேம்பட்ட பாதுகாப்பு அம்சங்கள் இடம்பெற்றுள்ளன.
மலேசியாவில் விரைவில் அறிமுகமாக இருந்த புதிய அனைத்துலக கடப்பிதழ் விநியோக திட்டம் தற்காலிகமாக ஒத்திவைக்கப்பட்டுள்ளதாக குடிநுழைவுத் துறை அதிகாரப்பூர்வமாக அறிவித்துள்ளது.
ஜூன் 1 முதல் நாடு முழுவதும் புதிய வடிவமைப்பிலான கடப்பிதழ்கள் வழங்கப்படவிருந்த நிலையில், பொதுமக்கள் அதிக அளவில் ஒரே நேரத்தில் விண்ணப்பிக்க வாய்ப்புள்ளதால் சேவை மையங்களில் நெரிசல் ஏற்படலாம் என அதிகாரிகள் தெரிவித்துள்ளனர்.
புத்ராஜெயாவில் நடைபெற்ற செய்தியாளர் சந்திப்பில் குடிநுழைவுத் துறையின் தலைமை இயக்குநர் டத்தோ ஜகாரியா ஷாபான் இந்த அறிவிப்பை வெளியிட்டார். பொதுமக்களுக்கு சிரமமில்லாத மற்றும் ஒழுங்கான சேவையை வழங்கும் நோக்கில் இந்த முடிவு எடுக்கப்பட்டதாகவும் அவர் கூறினார்.
புதிய கடப்பிதழ் விநியோகத்திற்கான மாற்று தேதி பின்னர் அதிகாரப்பூர்வமாக அறிவிக்கப்படும் என்றும் தெரிவிக்கப்பட்டுள்ளது. இதற்கிடையில் தற்போது பயன்பாட்டில் உள்ள மலேசிய கடப்பிதழ்கள் வழக்கம்போல் புதுப்பிக்கப்படலாம் என்றும், அவை காலாவதி தேதி வரை செல்லுபடியாக இருக்கும் என்றும் தெளிவுபடுத்தப்பட்டுள்ளது.
புதிய தலைமுறை கடப்பிதழ்களில் மேம்பட்ட பாதுகாப்பு தொழில்நுட்பங்கள் இணைக்கப்பட்டுள்ளன. குறிப்பாக மறைபடக் காட்சி அம்சங்கள், நவீன ஹோலோகிராம் பாதுகாப்பு, புற ஊதா அச்சு தொழில்நுட்பம் உள்ளிட்ட வசதிகள் சேர்க்கப்பட்டுள்ளன.
மொத்தமாக 94 பாதுகாப்பு அம்சங்களுடன் உருவாக்கப்பட்டுள்ள இந்த புதிய கடப்பிதழ், போலி ஆவண தயாரிப்புகளை கட்டுப்படுத்தும் வகையில் வடிவமைக்கப்பட்டுள்ளதாக அதிகாரிகள் தெரிவித்துள்ளனர்.1
0 Comments
No comments yet. Be the first to comment.