முதியோர்களின் நலன் காக்க தனி அமைச்சகம் தேவை: அமைச்சர் ஹன்னா இயோ வலியுறுத்தல்

மலேசியாவில் முதியோர்களின் நலன், கொள்கை உருவாக்கம் மற்றும் அதற்கான பட்ஜெட் ஒதுக்கீடு ஆகியவற்றுக்கு அதிக முக்கியத்துவம் அளிக்கும் வகையில் 'முதியோர் விவகார அமைச்சகம்' ஒன்றை அரசு உருவாக்க வேண்டும் என பிரதமர் துறை அமைச்சர் (கூட்டாட்சிப் பிரதேசங்கள்) ஹன்னா இயோ கோரிக்கை விடுத்துள்ளார். முதியோர்கள் தற்போதும் சமூகத்தின் உற்பத்தித் திறன் கொண்ட அங்கத்தினராகவே உள்ளனர் என்பதை உணர்ந்து, அவர்கள் வேலை செய்ய முடியாதவர்கள் என்ற தவறான எண்ணத்தை கொள்கை வகுப்பாளர்கள் கைவிட வேண்டும் என அவர் கேட்டுக்கொண்டார். முதியோர்களுக்கென தனி அமைச்சகமும், பிரத்யேக பட்ஜெட்டும் இல்லாதவரை, சட்டங்களில் அவர்களுக்கான உரிமைகளை முழுமையாக நிலைநிறுத்துவது கடினம் என்பதை அவர் சுட்டிக்காட்டினார்.

'சில்வர் எகானமி 2026' (High-Level Forum on the Silver Economy 2026) தொடர்பான உயர்மட்டக் குழு விவாதத்தில் பங்கேற்றுப் பேசிய அவர், முறையான நிறுவனக் கட்டமைப்பு இல்லாத நிலையில் முதியோர்களின் அடிப்படைத் தேவைகள் எளிதில் புறக்கணிக்கப்பட வாய்ப்புள்ளது என்றார்.

குறிப்பாகத் தனித்து வாழும் முதியவர்கள் மற்றும் துணைவரை இழந்தவர்களின் சமூக மற்றும் உணர்வுபூர்வமான தேவைகளை அரசு கவனத்தில் கொள்ள வேண்டும். முதியோர்களுக்கான திட்டங்களை வெறும் மருத்துவப் பரிசோதனைகள் மற்றும் நிதித் திட்டமிடலோடு சுருக்கிக் கொள்ளாமல், அவர்கள் மற்றவர்களுடன் பழகுவதற்கும் நேரத்தை செலவிடுவதற்கும் பாதுகாப்பான இடங்களை உருவாக்குவது முதியோர் நலக் கொள்கையின் முக்கிய அங்கமாக இருக்க வேண்டும்.

முதியோர்களுக்கான சட்டப் பாதுகாப்பை வலுப்படுத்தும் நோக்கில் பிரதமர் துறையின் சட்ட விவகாரப் பிரிவு 'மனநலத் திறன் சட்டத்தை' (Mental Capacity Act) தற்போது தீவிரமாக வடிவமைத்து வருகிறது. இந்தச் சட்டம் முதியோர்கள் எதிர்கொள்ளும் புறக்கணிப்பு மற்றும் வன்கொடுமைகளைத் தடுப்பதோடு, அவர்களின் சுகாதாரம், பொது நலன் மற்றும் சொத்துகள் தொடர்பான முக்கிய முடிவுகளை எடுக்கும் உரிமையையும் பாதுகாக்கும் என உதவி இயக்குநர் நூர் ஷாகியரின் அப்துல் மனான் விளக்கினார்.

இது விரைவில் வரவிருக்கும் முதியோர் மசோதாவுக்கு (Senior Citizen Bill) கூடுதல் வலுசேர்க்கும் வகையிலும் அமையும். இந்த உத்தேச சட்டம் ஷரியத் விவகாரங்களில் மாநிலங்களின் அதிகார வரம்பை மீறாமல் இருப்பதை உறுதி செய்யவும், இஸ்லாமியச் சட்டக் கண்ணோட்டங்களைக் கேட்டறியவும் விரிவான ஆலோசனைகள் முன்னெடுக்கப்படுகின்றன. இதற்காக மாநில முஃப்திகள் மற்றும் ஷரியத் நீதித்துறையைச் சேர்ந்த பிரதிநிதிகளை உள்ளடக்கிய சிறப்பு ஆலோசனைக் கூட்டம் நடப்பு மாதத்தில் நடைபெறவுள்ளது. இதன் மூலம் முதியோர்களின் நலன் காக்கும் சட்ட வரைவு அனைத்து தரப்பினரின் ஒப்புதலுடனும், நடைமுறைக்கு வரும் என எதிர்பார்க்கப்படுகிறது.