புக்கிட் மெர்தாஜாமில் ஆன்லைன் 'காதல் மோசடி': 4 பேருக்கு தலா RM3,000 அபராதம்!
பினாங்கு, செபராங் பெராய் பகுதியில் செயல்பட்டு வந்த ஆன்லைன் 'காதல் மோசடி' (Love Scam) கும்பலைச் சேர்ந்த நான்கு இளைஞர்கள் குற்றத்தை ஒப்புக்கொண்டதையடுத்து, புக்கிட் மெர்தாஜாம் நீதிமன்றம் அவர்களுக்கு தலா 3,000 ரிங்கிட் அபராதம் விதித்துத் தீர்ப்பளித்துள்ளது.
பினாங்கு மாநிலம், செபராங் பெராய் தெங்கா மாவட்டத்தில் உள்ள தாமான் அல்மா இண்டா (Taman Alma Indah) பகுதியில் ஆன்லைன் மோசடியில் ஈடுபட்ட நான்கு பேர் கைது செய்யப்பட்டனர். அக்டோபர் 19-ஆம் தேதி இரவு 11.15 மணியளவில் பிடிபட்ட இவர்கள், 'காதல் மோசடி' (Love scam) கும்பலுடன் தொடர்புடையவர்கள் ஆவர். ஹோ குய் மிங் (33), எட்மண்ட் யீ கான் சி (26), சூ சின் துவான் (33) மற்றும் தியோங் வெங் சியோங் (32) ஆகிய இந்த நால்வர் மீதும் குற்றவியல் சட்டம் பிரிவு 417 மற்றும் 120B(1)-இன் கீழ் வழக்குப்பதிவு செய்யப்பட்டது.
புக்கிட் மெர்தாஜாம் மாஜிஸ்திரேட் நீதிமன்றத்தில் நீதிபதி ஷரிஃபா ரசாலி முன்பு இந்த வழக்கு விசாரணைக்கு வந்தது. அரசு தரப்பில் துணைப் பப்ளிக் ப்ராசிகியூட்டர் சித்தி நுர் அமலினா ஹருண் ஆஜரானார். குற்றம் சாட்டப்பட்டவர்கள் தங்களின் குற்றத்தை ஆரம்பத்திலேயே ஒப்புக்கொண்டதால், நீதிமன்றத்தின் நேரமும் செலவும் மிச்சமாகியுள்ளதாக அவர்களின் வழக்கறிஞர்களான இமா ஷாகிரா முகமட் சலீம் மற்றும் சியாங் கியான் ஹாங் ஆகியோர் வாதிட்டனர். இதனைக் கருத்தில் கொண்ட நீதிபதி, நான்கு பேருக்கும் தலா 3,000 ரிங்கிட் (RM3,000) அபராதம் விதித்துத் தீர்ப்பளித்தார்; அபராதத்தைக் கட்டத் தவறினால் 6 மாத சிறைத்தண்டனை அனுபவிக்க வேண்டும் எனவும் உத்தரவிடப்பட்டுள்ளது
0 Comments
No comments yet. Be the first to comment.