சிறுவர்களின் 'ஸ்கிரீன் நேரத்தை' குறைக்க அதிரடி திட்டம்: ஆன்லைன் தளங்களுடன் மலேசிய அரசு பேச்சுவார்த்தை!

மலேசியாவில் சிறுவர்கள் நீண்ட நேரம் மின்னணு சாதனங்கள் மற்றும் இணையதளங்களைப் பயன்படுத்துவதைத் தடுக்க, அரசாங்கம் புதிய கட்டுப்பாடுகளைக் கொண்டுவர திட்டமிட்டுள்ளது. குறிப்பாக, ஆன்லைன் தளங்களில் சிறுவர்களுக்கான 'ஸ்கிரீன் நேரத்தை' (Screen-time) தானாகவே கட்டுப்படுத்தும் வசதியை அறிமுகப்படுத்த தீவிர ஆலோசனை நடைபெற்று வருகிறது. மக்களவையில் (Dewan Rakyat) இது குறித்துப் பேசிய தகவல் தொடர்பு அமைச்சர் டத்தோ ஸ்ரீ ஃபாஹ்மி ஃபட்சில், சிறுவர்கள் ஒரு மணி நேரம் தொடர்ந்து யூடியூப் ஷார்ட்ஸ் (YouTube Shorts) போன்ற வீடியோக்களைப் பார்த்தால், கட்டாயம் இடைவேளை (Break) எடுக்கும் வகையில் மாற்றங்கள் கொண்டுவரப்படும் எனத் தெரிவித்தார்.

பெற்றோர்கள் தாங்களாகவே இந்தக் கட்டுப்பாடுகளை இயக்க வேண்டிய அவசியமின்றி, இயல்பாகவே (by default) இந்த வசதி செயல்படும் வகையில் பிற ஆசியான் (ASEAN) நாடுகளுடனும் பேச்சுவார்த்தை நடந்து வருகிறது. தற்போதைய காலகட்டத்தில், தங்களது சாதனங்களில் உள்ள 'Parental Control' வசதிகளைப் பயன்படுத்தி குழந்தைகளின் ஸ்கிரீன் நேரத்தைக் கட்டுப்படுத்த முடியும் என்பது பல பெற்றோர்களுக்குத் தெரிவதில்லை.

எனவேதான், அரசாங்கம் இந்த தானியங்கி கட்டுப்பாடுகளை வலியுறுத்துகிறது. மேலும், 2027-ஆம் ஆண்டு பட்ஜெட்டில் 'பாதுகாப்பான இணையப் பிரச்சாரத்திற்காக' (Safe Internet Campaign) RM58.7 மில்லியன் நிதி ஒதுக்கப்பட்டுள்ளது. இந்த நிதியின் மூலம், இணைய ஆபத்துகளில் இருந்து குழந்தைகளை எப்படிப் பாதுகாப்பது என்பது குறித்து பெற்றோர்கள், பாதுகாவலர்கள் மற்றும் ஆசிரியர்களுக்கு விழிப்புணர்வு நிகழ்ச்சிகள் நடத்தப்படும் என்று அமைச்சர் ஃபாஹ்மி குறிப்பிட்டார்.

ஆன்லைன் விளையாட்டுகளில் (Online Gaming) உள்ள ஆபத்துகளைக் கண்டறிந்து தகுந்த பாதுகாப்பை உறுதிசெய்ய, மலேசிய தகவல் தொடர்பு மற்றும் மல்டிமீடியா ஆணையம் (MCMC) மற்றும் மலேசிய தகவல் தொடர்பு மற்றும் மல்டிமீடியா உள்ளடக்க மன்றம் (CMCF) ஆகியவை தீவிரமாகச் செயல்பட்டு வருகின்றன. இதற்காக சர்வதேச அளவில் பின்பற்றப்படும் சிறந்த பாதுகாப்பு நடைமுறைகளை MCMC ஆய்வு செய்து வருகிறது. அதே வேளையில், கேமிங் தொடர்பான புதிய வழிகாட்டுதல்களை (gaming subcode) உருவாக்குவதற்காக CMCF பொதுமக்களிடம் கருத்துக்களைக் கேட்டு வருவது குறிப்பிடத்தக்கது.