காப்பிட்டில் உயிருடன் புதைக்கப்பட்ட குழந்தை மீட்பு: தாயின் மனநிலை குறித்து தீவிர விசாரணை!
சரவாக், காப்பிட் பகுதியில் உயிருடன் புதைக்கப்பட்டு மீட்கப்பட்ட பச்சிளம் குழந்தை சிபு மருத்துவமனையில் தீவிர சிகிச்சை பெற்று வருகிறது. இச்சம்பவத்தில் ஈடுபட்ட தாய்க்கு பிரசவத்திற்கு பிந்தைய மன அழுத்தம் (Postpartum depression) உள்ளதா என்பது குறித்து மருத்துவ குழுவினர் மற்றும் ஆலோசகர்கள் விசாரித்து வருகின்றனர் என்று அமைச்சர் டத்தோ ஸ்ரீ நான்சி சுக்ரி தெரிவித்துள்ளார்.
சரவாக் மாநிலம் காப்பிட் (Kapit), ஜாலான் ஏர்போர்ட் பகுதியில் உள்ள ஒரு வாடகை வீட்டிற்கு அருகே உயிருடன் புதைக்கப்பட்ட ஆண் குழந்தை ஒன்று சமீபத்தில் மீட்கப்பட்டது. ஆரம்பத்தில் ஆபத்தான நிலையில் மீட்கப்பட்ட அந்தப் பச்சிளம் குழந்தை, உடனடியாக சிபு மருத்துவமனைக்கு (Sibu Hospital) கொண்டு செல்லப்பட்டு அங்கு சிறப்பு சிகிச்சை பெற்று வருகிறது. இந்தச் சம்பவம் குறித்து காவல் துறையினர் குற்றவியல் சட்டம் பிரிவு 317-ன் கீழ் தீவிர விசாரணை மேற்கொண்டு வருகின்றனர்.
தற்போது தாயும் குழந்தையும் மருத்துவமனையில் தொடர்ந்து சிகிச்சை பெற்று வருவதாகத் தெரிவிக்கப்பட்டுள்ளது. இந்தச் சம்பவம் குறித்து பேசிய மகளிர், குடும்பம் மற்றும் சமூக மேம்பாட்டுத் துறை அமைச்சர் டத்தோ ஸ்ரீ நான்சி சுக்ரி, குழந்தையின் தாய்க்கு பிரசவத்திற்குப் பிந்தைய மன அழுத்தம் இருந்ததா என்பது மருத்துவ ரீதியாக இன்னும் உறுதிப்படுத்தப்படவில்லை என்று கூறினார். தாயின் உண்மையான மனநலப் பிரச்சனையை கண்டறிவதில் ஆலோசகர்கள் மற்றும் மருத்துவப் பணியாளர்களுக்கு முக்கிய பங்கு உள்ளதாக அவர் சுட்டிக்காட்டினார்.
காவல்துறை விசாரணை தொடர்ந்து நடந்து வரும் நிலையில், அமைச்சகத்தின் பாதுகாப்புப் குழுவினர் சம்பந்தப்பட்ட குடும்பத்தினருடனும் ஆலோசகர்களுடனும் இணைந்து அவர்களுக்குத் தேவையான உதவிகளை வழங்க பணியாற்றி வருகின்றனர் என்றும் அவர் தெரிவித்தார். சிகிச்சைக்குப் பிறகு குழந்தையை குடும்ப உறுப்பினர்களிடம் ஒப்படைப்பதா அல்லது வேறு தகுதியான நபர்களின் பாதுகாப்பில் விடுவதா என்பது குறித்த விவாதங்கள் இன்னும் முடிவடையவில்லை என்று அமைச்சர் நான்சி குறிப்பிட்டார்.
மேலும், பிரசவத்திற்குப் பிறகு உணர்ச்சி ரீதியாகவும் மன ரீதியாகவும் தவிக்கும் தாய்மார்கள், தேசிய மக்கள் தொகை மற்றும் குடும்ப மேம்பாட்டு வாரியத்தின் (LPPKN) கீழ் செயல்படும் 'மாமாகேர்' (MamaCare) திட்டத்தின் மூலம் தகுந்த ஆலோசனைகளையும் உடல்நல ஆதரவையும் பெற்றுக்கொள்ள வேண்டும் எனவும் அவர் அறிவுறுத்தினார்.
0 Comments
No comments yet. Be the first to comment.