பூமியின் அடியில் ஒரு பிரம்மாண்ட உலகம்: போர்னியோவில் ஒளிந்திருக்கும் உலகின் மிகப்பெரிய குகை அறை!

மலேசியாவின் போர்னியோ தீவில் உள்ள குனுங் முலு தேசிய பூங்காவில் (Gunung Mulu National Park) அமைந்துள்ளது 'சரவாக் சேம்பர்' (Sarawak Chamber). 'குவா நாசிப் பாகுஸ்' (Gua Nasib Bagus - நல்ல அதிர்ஷ்ட குகை) என்ற அமைப்பின் உள்ளே அமைந்திருக்கும் இது, பரப்பளவில் உலகின் மிகப்பெரிய குகை அறையாகக் கருதப்படுகிறது. அடர்ந்த மழைக்காடுகளுக்கு அடியில் மறைந்திருக்கும் இந்த பிரம்மாண்டமான இயற்கை அதிசயம், உலகெங்கிலும் உள்ள சாகசப் பயணிகளையும், ஆராய்ச்சியாளர்களையும் பல தசாப்தங்களாக ஆச்சரியத்தில் ஆழ்த்தி வருகிறது.

இந்த குகை அறையின் கண்டுபிடிப்புப் பின்னணி மிகவும் சுவாரஸ்யமானது. 1981 ஆம் ஆண்டில், குகை ஆராய்ச்சியாளர்கள் குழு ஒன்று இந்த இருண்ட குகைக்குள் ஆய்விற்காக நுழைந்தது. பல மணிநேரம் இருளில் நடந்தும் குகையின் சுவர்களை அவர்களால் எட்ட முடியவில்லை. முதலில் தாங்கள் வழியறிந்து ஒரே இடத்தையே சுற்றிச் சுற்றி வருகிறோமோ என்று அவர்கள் குழப்பமடைந்தனர். ஆனால், தங்கள் சக்திவாய்ந்த டார்ச் வெளிச்சம் இருளில் காணாமல் போவதைக் கண்ட பின்னரே, தாங்கள் ஒரு மிகப்பெரிய குகை அறையைக் கண்டுபிடித்துள்ளோம் என்ற மாபெரும் உண்மையை அவர்கள் உணர்ந்தனர்.

சரவாக் சேம்பரின் பிரம்மாண்டத்தை அளவீடுகள் மூலம் மட்டுமே நாம் முழுமையாகப் புரிந்துகொள்ள முடியும்.இது சுமார் 600 மீட்டர் நீளமும், 415 மீட்டர் அகலமும், 80 மீட்டர் உயரமும் கொண்ட ஒரு பிரம்மாண்டமான நிலத்தடி வெற்றிடமாகும்.இதன் அளவு எவ்வளவு பெரியது என்றால், இதில் இங்கிலாந்தின் புகழ்பெற்ற 'வெம்ப்ளி' (Wembley) விளையாட்டு மைதானங்கள் இரண்டை எளிதாக உள்ளே வைத்துவிடலாம். மேலும், பல போயிங் 747 விமானங்களை வரிசையாக நிறுத்தும் அளவிற்கு இது மிகப்பரந்த நிலப்பரப்பைக் கொண்டுள்ளது. கன அளவின் (Volume) அடிப்படையில் பார்த்தால், சீனாவின் மியாவ் அறைக்கு (Miao Room) அடுத்தபடியாக இது உலகின் இரண்டாவது பெரிய குகை அறையாகும்.

பல லட்சம் ஆண்டுகளாக ஓடும் நிலத்தடி ஆறுகளாலும், அங்குள்ள சுண்ணாம்புப் பாறைகள் மெல்ல மெல்லக் கரைந்ததாலும் இந்த குகை இயற்கையாகவே உருவானது. சரவாக் சேம்பரைச் சென்றடைவது என்பது சாதாரண சுற்றுலாப் பயணிகளுக்கு சாத்தியமற்ற ஒன்று. இந்த குகையின் வாசலை அடைய ஒரு நிலத்தடி ஆற்றின் நீரோட்டத்தை எதிர்த்து நீந்தியும், செங்குத்தான பாறை விளிம்புகளில் மிகவும் அபாயகரமான பயணத்தை மேற்கொண்டும் மட்டுமே செல்ல முடியும். மனிதர்களால் முழுமையாக ஆராய முடியாத பல இருண்ட ரகசியங்களை இன்றும் இந்த குகை தன்னுள் அடக்கி வைத்துள்ளது.