தூண்டிலை எடுக்க ஆற்றில் இறங்கிய 9 வயது சிறுவன் முதலை தாக்கி பலி!
குடாட் அருகே பங்கி தீவில் உள்ள சுங்கை செமாய் ஆற்றில் மீன்பிடித்துக் கொண்டிருந்த போது, ஆற்றில் சிக்கிய தூண்டிலை எடுக்க தண்ணீரில் இறங்கிய 9 வயது சிறுவன் முதலை தாக்கி பரிதாபமாக உயிரிழந்தான்.
குடாட் அருகே பங்கி தீவில் உள்ள சுங்கை செமாய் ஆற்றில் தனது சகோதரனுடன் மீன்பிடிக்கச் சென்ற 9 வயது சிறுவன், முதலை தாக்கி பரிதாபமாக உயிரிழந்தான். எஸ்கே செமாய் பள்ளியில் மூன்றாம் வகுப்பு படித்து வந்த அந்தச் சிறுவன், விடுமுறை நாளில் மீன்பிடிக்கச் சென்றபோது இந்த எதிர்பாராத துயரச் சம்பவம் நடந்துள்ளது.
நேற்று மதியம் சுமார் 3.30 மணியளவில், தண்ணீருக்குள் சிக்கிக்கொண்ட தூண்டிலை எப்படியாவது எடுத்துவிடலாம் என அந்தச் சிறுவன் ஆற்றில் இறங்கியுள்ளான். அப்போது எதிர்பாராத விதமாக அங்கு வந்த முதலை அவனைத் தாக்கியது. இந்தச் சம்பவம் குறித்து பள்ளி ஆசிரியர் ஒருவர் மூலம் மாலை 4.30 மணியளவில் தங்களுக்குத் தகவல் கிடைத்ததாக குடாட் மாவட்ட காவல்துறை கண்காணிப்பாளர் முகமது ஹாரிஸ் இப்ராகிம் தெரிவித்தார்.
தகவல் அறிந்ததும், காவல்துறையினர், சிவில் பாதுகாப்பு படையினர் மற்றும் அப்பகுதி கிராம மக்கள் இணைந்து சிறுவனைத் தேடும் பணியில் தீவிரமாக ஈடுபட்டனர். பல மணி நேர நீண்ட தேடலுக்குப் பிறகு, சுங்கை செமாய் பாலத்தின் அடியில் சிறுவனின் சடலம் கண்டெடுக்கப்பட்டது. சிறுவனின் தலையில் பலத்த காயங்கள் இருந்ததாகக் காவல்துறையினர் உறுதிப்படுத்தினர். மீட்கப்பட்ட உடல் முதலில் கராக்கிட் காவல் நிலையத்திற்கு கொண்டு செல்லப்பட்டு, பின்னர் குடாட் மருத்துவமனைக்கு அனுப்பி வைக்கப்பட்டது. கோத்தா கினாபாலுவில் உள்ள குயின் எலிசபெத் மருத்துவமனை தடயவியல் துறையின் முறையான அனுமதிக்காகக் காத்திருப்பதாகவும், அதன்பிறகே பிரேதப் பரிசோதனை நடைபெறும் என்றும் போலீசார் கூறினர். தற்போதைக்கு இந்த வழக்கை 'திடீர் மரணம்' என காவல்துறையினர் பதிவு செய்துள்ளனர்.

0 Comments
No comments yet. Be the first to comment.