TBC News Malaysia

TBC News Magazine brings you trusted timely and thought-provoking stories from around the globe.

Follow Us

தமிழ்ப் பள்ளிகள் வாழ்வியலின் பாசறை -டத்தோ அருள் தாசன் புகழாரம்

Share This Article:

பினாங்கு, மலக்கோப் தோட்டத் தமிழ்ப்பள்ளியில் நடைபெற்ற தீபாவளி அன்பளிப்பு விழாவில் கலந்துகொண்ட டத்தோ அருள்தாசன், தமிழ்ப்பள்ளிகளே மாணவர்களுக்கு வாழ்வியலைக் கற்பிக்கும் உன்னத தளம் எனவும், மாணவர்கள் தொழில்நுட்பத் துறையில் கவனம் செலுத்த வேண்டும் எனவும் அறிவுறுத்தினார்.

தமிழ்ப் பள்ளிகள் வாழ்வியலின் பாசறை -டத்தோ அருள் தாசன் புகழாரம்

பினாங்கு, தாசெக் குளுகோர் பகுதியில் உள்ள மலக்கோப் தோட்டத் தமிழ்ப்பள்ளியில் 'பெர்தாமா பினாங்கு' அமைப்பின் சார்பில் மாணவர்களுக்கான தீபாவளி அன்பளிப்பு மற்றும் விருந்து உபசரிப்பு விழா மிகச் சிறப்பாக நடைபெற்றது. இவ்விழாவில் கலந்துகொண்டு சிறப்புரையாற்றிய பினாங்கு மாநிலத் தமிழ்ப்பள்ளி முன்னாள் மாணவர்கள் பேரவையின் (PERTAMA) ஆலோசகர் டத்தோ அருள்தாசன், தமிழ்ப்பள்ளிகள் வெறும் கல்விக்கூடங்கள் மட்டுமல்ல; அவை மாணவர்களுக்கு நற்குணங்களையும் வாழ்வியலின் அடிப்படைப் பண்புகளையும் கற்றுக்கொடுக்கும் உன்னதப் பாசறையாகத் திகழ்கின்றன என்று நெகிழ்ச்சியோடு குறிப்பிட்டார்.

மாணவர்களின் முன்னேற்றத்தில் ஆசிரியர்களின் அர்ப்பணிப்பு அளப்பரியது என்று பாராட்டிய அவர், இன்றைய காலக்கட்டத்திற்கு ஏற்ப மாணவர்கள் தங்களை வளர்த்துக்கொள்ள வேண்டியதன் அவசியத்தை வலியுறுத்தினார். குறிப்பாக, தொழில்நுட்பமும் செயற்கை நுண்ணறிவும் (AI) நாளுக்கு நாள் அசுர வளர்ச்சி அடைந்து வரும் இந்த நவீனச் சூழலில், தமிழ்ப்பள்ளி மாணவர்கள் இத்துறைகளில் அதிகக் கவனம் செலுத்தி மாபெரும் வெற்றிகளைப் பெற வேண்டும் என அவர் கேட்டுக்கொண்டார்.

Content image

பிறைத் தமிழ்ப்பள்ளியில் தான் பெற்ற சிறந்த அடித்தளமே, பின்னாளில் பல முன்னணி நாளிதழ்களில் தான் பணியாற்றி உயர்ந்த நிலையை அடையக் காரணமாக அமைந்தது என்ற தனது சொந்த அனுபவத்தையும் அவர் மாணவர்களோடு பகிர்ந்துகொண்டார். இந்த மகிழ்ச்சியான நிகழ்வில் கலந்துகொண்ட பினாங்கு பெர்தாமா பேரவையின் தலைவர் ச. வேலாயுதம், மாணவர்கள் கல்வியில் முழு கவனம் செலுத்தி, எதிர்காலத்தில் நாட்டின் சிறந்த குடிமக்களாகத் திகழ வேண்டும் என அறிவுரை கூறினார். அதனைத் தொடர்ந்து, மாணவர்களின் முகத்தில் புன்னகையை ஏற்படுத்தும் விதமாக அனைவருக்கும் ஆங்பாவ் உறைகளும், சிறப்புப் பரிசுப் பெட்டகங்களும் வழங்கி சிறப்பிக்கப்பட்டன.

திருமதி மேகாவதி அவர்களின் ஆதரவிலும் பங்களிப்பிலும் நடைபெற்ற இந்த நெகிழ்ச்சியான விழாவில், மலக்கோப் தோட்டத் தமிழ்ப்பள்ளியின் தலைமையாசிரியர் தியாகராஜன், பள்ளியின் ஆசிரியர்கள், பேரவையின் உறுப்பினர்கள் மற்றும் 85 மாணவர்கள் மிகுந்த உற்சாகத்துடன் கலந்துகொண்டனர். தமிழ்ப்பள்ளிகள் நம் சமூகத்தின் ஆணிவேர் என்பதையும், அதுவே நம் இனத்தின் அடையாளம் என்பதையும் இந்த நிகழ்வு மீண்டும் ஒருமுறை ஆழமாக உணர்த்தியுள்ளது.

0 Comments

No comments yet. Be the first to comment.

Leave a Comment
image
image
image
image
image

Subscribe to our new updates!

terms & conditions